I Suldal finn du fleire av dei høgste toppane i Rogaland, i tillegg til fjordnære fjelltoppar med storslagen utsikt, vidder der du får landskapet heilt for deg sjølv, ei rekke flotte turisthytter og familievenlege, sentrumsnære rusleturar. Kanskje møter du ein og annan Suldøl på vegen, men her er meir enn nok av fiskevatn, badeplassar og turstiar til oss alle! Sjekk vandreforslaga våre her og forlag til ditt neste fjelleventyr her. I sommarsesongen serverer dei trerettars middag og herleg frukostbuffet på "perlå i Ryfylkeheiane", Stranddalen turisthytte. Suldal ligg berre eit par timars køyring frå Preikestolen og frå Trolltunga.
Suldal er omkransa av majestiske fjordar, som på fine dagar ligg speglblanke mellom høge fjell. Er du båtturist og vil strekkje på beina er det gode turmoglegheiter rett frå båthamnene både på Sand, Halvøynå, Erfjord og Jelsa. I og langs fjordane våre kan ein utforske fjordgrendene, sykle tett på fjordlandskapet eller legge ut med havkajakk eller fiske etter krabbar og makrell og anna godt i fjorden. Er du glad i å bade er det også gode moglegheiter for det. Fleire aktivitetstilbydarar tilbyr utleige av utstyr og Aktiv Fuglestein kan ta deg med ut på guida SUP-tur i Økstrafjorden. Fleire andre kjekke sommaraktivitetar finn du i aktivitetskalenderen vår her, som blant anna båttur med Brødrene af Sand i sommarsesongen 2024. Ønskjer du ein lengre tur kan du dra sjøvegen på dagstur til Stavanger slik dei gjorde i gamle dagar.
I Suldal har ein nok grender og småstader til å utforske ein ny stad kvar einaste dag i veka! Kva med ein grendesafari? Jelsa er den best bevarte strandstaden i Ryfylke, med kvite trehus tett i tett mot fjorden. Besøk Jelsa kyrkje og kombiner gjerne med eit bad i fjorden på stranda rett ved. I Erfjord kan ein besøke museumsgarden Hålandstunet og dra på fuglekikking, ta seg ein vandretur eller eit bad i Habn. På Ropeidhalvøya kan ein finne vikinggraver og minnesmerke etter den største vikinghovdingen i Ryfylke! Her ligg også Hebnes vingard som er open for omvisning og vinsmaking i sommarsesongen (hugs å bestille på nettsidene deira). Gjennom våre kulturhistoriske løyper kan du bli tatt fleire hundre år tilbake i tid og læra om den rike historien til Suldal frå lokale forteljarar - direkte gjennom eigen mobil. I kommunesenteret Sand finn ein ei rekke lokale butikkar, kaféar, museum, badestrand og kulturhus - alt eit steinkast frå fjorden!
Er du ein erfaren laksefiskar eller nybegynnar? I Suldal finn ein fiskemoglegheiter tilpassa alle ønskje og kunnskapsnivå. Suldalslågen er vestlandets mest vassrike elv, og tiltrekk seg laksefiskarar frå fjern og nær kvar einaste år, som alle prøvar fiskelukka om å få storlaksen på kroken. Rekordlaksen blei fanga i 1913 og var på 34kg! Her tilbyr ein privat fiske, guida fisketurar, laksesafari og elveekspedisjon. Ullaelva i Ulladalen, som renn ut i Jøsenfjorden, er også ei lakseelv open for fiske. Hugs å gjer deg kjend med lokale reglar og betal fiskeavgift før du kastar snøret. Du kan også lære meir om suldalslaksen i Noregs første laksestudio. I heiå finn du flotte fiskevatn der du kan nyte frisk luft og lyden av fisken som hoppar. Her er det moglegheiter for å få storaure på kroken, og dei gode fiskevatna har fiskekort på inatur.no. Fisketuren kan kombinerast med telttur eller overnatting på DNT sine hytter. Fjorden er også full av diverse fiskar, og her er det gode moglegheiter for å ordne seg dagens middag.
I Suldal er me stolte over våre lokale råvarer og mattradisjonar, og alt ligg til rette for gode kulinariske opplevingar under opphaldet. I Sand sentrum finn ein ulike kafear og restaurantar der ein kan nyte gode rettar med utsikt over fjorden og livet i kommunesenteret. Ein kan også få med seg villmarkscamp hjå Mo Laksegard der ein får servert rettar til knitringa av bålet i lavoen. Hjå Ryfylke fjordhotell kan ein kjøpe seg lunsj, middag eller noko friskt å drikke med utsikt til elvaosen, og på Energihotellet får ein seg firerettars middag basert på lokale råvarer. Etter ein tur innover vakre Suldalsheiene kan du kjøpe deg ein trerettars middag hjå "perlå i Ryfylkeheiane" Stranddalen turisthytte.
I Suldal kan du også besøke produsentane sjølv på dei flotte gardane som ligg tett på fjell, fjordar og vatn. Hjå Hebnes vingard på Ropeidhalvøya kjem du tett på vinproduksjon med besøk i vinhagen, og det blir sjølvsagt tid til litt prøvesmaking! Hjå Fuglestein Fruktgard har dei over 17 000 epletre der du får læra meir om produksjonen og smake på dei ulike produkta deira. Hjå Suldalshonning kan du få ei innsikt i det viktige og fascinerande livet til biene og sjå med eigne auge prosessen med å produsere honning. Træ Gården har også eigen gardsbutikk i Sandsbygda med kjøt frå mellom anna angus, villsau og hjort. Det finst mange fleire gardsutsal og produsentar i kommunen og oversikt over alle matskattane finn du her.
I Suldal kan du velge ut nye badeplassar for familien kvar einaste dag! Alle grendene våre har flotte badeplassar som du kan få for deg sjølv i både saltvatn og ferskvatn. Her kan du nyte ein heil dag ved Mosvatnet, som kan kombinerast med tur i heia, båttur til nærmaste øy og ein forfriskande dusj i fossen opp mot Onglaniuten. Ved Neset badestrand i kommunesenteret Sand kan ein leige strandutstyr og kajakkar, eller øve på balansen i klatreparken. I Erfjord kan ein nyte ein dag i fjorden på badestranda Habn, eller du kan hoppe i havet på Jelsa - den best bevarte strandstaden i Ryfylke. Finn deg elles badeplassar langs fjorden eller i fjellvatn i regionen.
Hjå Suldal bad kan du utfordre familien til konkurranse i sklia, frå stupebretta og i klatreveggen eller slappe av i boblebadet eller badstua. Du kan også unne familien ein kveld i badstove eller stamp med utsikt over Suldalsvatnet, Sandsfjorden eller Suldalslågen.
I Suldal finn du ei rekke flotte museumsanlegg som ein kan utforske både i og utanfor opningstida. Ved Nesasjøhuset møter du Kvitebjørnen frå barneeventyret til Rasmus Løland, ved Kulturhuset i Suldal kan du dra på galleriutstilling, frå klyngetunet Litunet får du majestetisk utsikt over Hylsfjorden og på storgarden Kolbeinstveit kan du besøke Rogalands eldste trebygg! Du finn også bowling, kino, bibliotek og arrangement på Kulturhuset i Suldal. Børkjenes gard i Hamrabø tilbyr omvisning både inne og ute på bestilling.
Arkitekturrundturen Suldal-Sauda-Røldal byr på historisk og moderne arkitektur i verdsklasse. Ruta har den beste samlinga av arkitektoniske verk i Fjord-Noreg og er den einaste Nasjonale turistvegen som presenterer både historisk og moderne arkitektur i eit dagsturformat. På Kilen på Nesflaten møter ein funksjonalistisk stil frå kraftutbygginga på 1960-talet, på Ropeid kjem fjorden inn vindauga ved "venterommet", ein kan bli inspirert av Lars Hertervig ved Ostasteidn og ved Høsebrua kan ein sjå Suldalslågen bruse under beina. I Sauda kjenner ein naturkreftene til Svandalsfossen og får nye inntrykk i Almannajuvet, og i Røldal kan ein besøke stavkyrkja før turen nedover Brattlandsdalen byr på majestetiske Flesefossen.
Om sommaren er det mykje kjekt å finne på i heile kommunen. Ein kan få med seg kunstutstilling og kinoframsyningar ved Kulturhuset i Suldal, ta ei reise tilbake i historia på museumstuna til Ryfylkemuseet, utforske den handmåla stjernehimmelen i Jelsa kyrkje og oppleve fjordidyll under torgdagar ved Sand sentrum. Første helga i juni arrangerer ein også folkefesten Ryfylkedagane. Heile sommarprogrammet og opningstider finn du under "Kva skjer" og "Bli inspirert".
Suldal er eit flott utgangspunkt for å utforske regionen, midt mellom Preikestolen og Trolltunga. Nasjonal Turistveg Ryfylke og Discovery Route går gjennom kommunen, medan Nasjonal Turistveg Hardanger ligg like ved. Folgefonna, baroniet i Rosendal, Røldal stavkyrkje, Åkrafjorden, Haugalandet og Stavanger er flotte stopp dersom du legg ut på dagstur.
Felles for alle feriar til Suldal er gode opplevingar, nærleik til naturen og tid til å puste ut og ta dagane i eit rolegare tempo. Me ønskjer at du vaknar opp og kjenner på den friske lufta og fuglane som kvitrar, mens du nyt frukosten og planlegg dagens eventyr. Fokuset er på å vera i lag og å kjenne etter.
Ønskjer du fleire forslag til gode opplevingar i Suldal kan du lese her eller laste ned appen vår "Visit Suldal" i Google Play eller App Store. Me høyrer også meir enn gjerne frå deg på suldal@visitsuldal.no eller via melding på Facebook og Instagram om du treng hjelp eller tips til planlegginga!
Eit tradisjonsrikt hyttetun tett på Suldalslågen. Garden har eige møterom for grupper og fiskerettar til elva.
Opplev Ryfylke Fjordhotell i Sand, et perfekt utgangspunkt for fjordutsikt, kultur og aktiviteter. Nyt lokale delikatesser og eventyrlige opplevelser!
Opplev Jelsa Hotell i Ryfylke: Moderne komfort i historisk strandstad. Nyt lokale matskattar og unike opplevingar ved fjorden. Bestill ditt opphald no!
Det over 100 år gamle gardstunet ligg eit steinkast frå Suldalsvatnet. Nyt ein avslappande ferie i di private hytte, ta deg eit bad eller samle familien nede i grillstova om kvelden.
Gata 22, 4230 Sand (Sommarsesongen)
Sandsvegen 134, 4230 Sand (Heile året)
Tel: (+47) 995 63 001
E-post: suldal@visitsuldal.no
