Kurs og konferanse

Suldal, med sin storslagne natur, idylliske grender og rike lokale mattilbod, set den perfekte ramma for kurs og konferansar. Her kan ein kombinere møter og felles samtalar med besøk til lokale matprodusentar, vakre rusleturar, "team building"-aktivitetar på lokale gardar og gode, kortreiste smaksopplevingar!

Møte- og konferanselokale

Fleire av våre overnattingsstader tilbyr møte- og konferanselokale. Her er nokre utvalde stader:

Ryfylke fjordhotell har møterom i fleire storleikar, som kan tilpassast alt frå 5-300 personar. Hotellet ligg midt i Sand sentrum, der ein kan nyte servering i deira inne- og uterestaurant med panoramautsikt over Sandsfjorden. Båten frå Stavanger legg også til kai like ved hotellet.
Suldal hotell ligg i Sand sentrum, med gåavstand frå Hurtigbåtkaien. Hotellet har overnattings- og konferansemoglegheiter, og lokalet har flott fjordutsikt.
På Energihotellet på Nesflaten har dei møterom til opptil 35 personar, der ein kan kombinere møteaktivitet med fantastisk fire-rettars servering i restauranten, guida omvisning i kraftbygda og andre aktivitetar i området rundt. Energihotellet kan også organisere møtelokale hjå andre tilbydarar i bygda.
Jelsa Hotell ligg tett på fjordlandskapet i det som ofte blir kalla den best bevarte strandstaden i Ryfylke. Her kan ein kombinere møterom til opptil 35 personar med servering av lokale råvarer i restauranten, ei omsyning i den historiske strandstaden, avslappande rusleturar og besøk til lokale matprodusentar.
Mo Laksegard ved Suldalslågen tilbyr konferanserom med sitjeplas for opptil 33 personar. Laksegarden er eit aktivitetssenter for opplevingar i og ved elva, og ei samling her kan kombinerast med besøk i gardsbryggeri, samling ved Moskjelen, villmarksleir, laksesafari, elveekspedisjon og mykje meir.
Den restaurerte løa på TræGården set den perfekte atmosfæra for ein stemningsfull kveld. Her serverer dei også ureist mat frå garden med produkt frå ullgris, wagyu, spælsau, villsau og hjort. Garden kan også tilby overnatting i hytte, samt team building "vikingleiker" ved elvebreidda.
Hanakamsneset gard tilbyr bakstehuset for grupper opptil 20 personar, der ein kan ha både møte og team building mens ein bakar seg pizza eller anna godt i steinomnen. Her kan ein også få smake på den lokale chorizo-pølsa av frittgåande utegris.
Løa og fjoset på Børkjenes gard, ein av dei eldste gardane i Suldal, set den perfekte ramma for ei samling utanom det vanlege. Her er det plass til totalt 100 personar.
Ønskjer de å arrangere samlinga ein annan stad kan også våre lokale kafear, KULP, Brunsj og Drøs, tilby catering etter dine ønskje.

Les meir om dei ulike tilbydarane under "Konferanse" ved å klikke deg inn under "Mat & Overnatting".

Team-building og aktivitetar

Kanskje ønskjer de å kombinere møtedagar med nokre pusterom der ein kjem seg ut for å få nye impulsar og for å knyte band utanføre kontoret? Her er nokre forslag til kjekke aktivitetar ein kan få med seg:

Mo Laksegard tilbyr villmarksleir med ulike «team building»-aktivitetar og servering i lavo
Bli med Mo Laksegard ut i elva, anten på laksesafari der du flyt i tørrdrakt med straumen eller i raft på elveekspedisjon
Kom tett på dei lokale råvarene ved å ta med gruppa på vinsmaking hjå Hebnes vingard, på omsyning i produksjonslokala hjå Suldalshonning, på besøk i bakstehuset til Fattnes Vestre eller på tur blant dei mange tusen epletrea på fruktgarden Fuglestein Fruktgard
Kombiner eit besøk til Træ Gården med lunsj eller middag med vikingleiker langs elvebreidda.
Få guide tur på historiske Børkjenes gard. Her tilbyr dei også overnatting.
Besøk Fuglestein Fruktgrad og få ei omsyning i frukthagen med smaksprøvar og aktivitetar.
Få guide SUP-tur eller kurs hjå Aktiv Fuglestein i Økstrafjorden.
Leig dykk stamp eller båt hjå Vikane hyttetun og avslutt med eit godt måltid i grillhytta deira tett på Suldalsvatnet.
Lær om honningproduksjon hjå Suldalshonning i Våge, og kombiner gjerne med ein historisk tur gjennom Hylsskardet.
Få eit innblikk inn i historia med ei privat omsyning på Ryfylkemuseet sine mange flotte museumstun. På Litunet får de fantastisk utsikt over Hylsfjorden, på Kolbeinstveit får de historia frå ein av storgardane i Suldalssamfunnet på 1800-talet og på hovudkontoret deira i Sand sentrum kan du besøke dei faste utstillingane deira. Det er også mogleg å leige den historiske seglskuta Brødrene af Sand! Les meir om fleire av anlegga deira på ryfylkemuseet.no
Nyt avslappande timar i Suldal Bad, der ein kan reservere heile anlegget for grupper utanom opningstid på bestilling. Det er også fleire som tilbyr badestamp og badstove, som mellom anna Mo Laksegard, Ryfylke fjordhotell, Energihotellet og Vikane hyttetun. Ønskjer ein litt meir spenning kan ein til dømes reservere guide SUP-tur i Økstrafjorden på aktivfuglestein.com.
I laksesesongen juni-september kan ein besøke Noreg sitt første Laksestudio. Her kan ein avtale med eigen guide som vil fortelje dykk meir om historia rundt laksen og lågen i det som er Noreg sin største kraftkommune. Er de ivrige fiskarar kan det vere ein tanke å kjøpe seg fiskekort hjå lokale grunneigarar og prøve fiskelukka.
Opplev kraftbygda Nesflaten gjennom guida tur frå Energihotellet. Dette er det best bevarte dømet på funksjonalistisk arkitektur i Noreg.
"På tur med Jelsapresten" er ei historisk vandring gjennom Jelsa i regi av Ryfylkemuseet. Her får ein høyre historia til Ryfylkes best bevarte strandstad mens ein går langs dei vakre trehusa og tittar innom kyrkja. Kanskje turen kan kombinerast med sjølvplukk av Jelsa Jordbær?
For dei som ønskjer seg ei oppleving på fjorden tilbyr Helgøy Skyssbåt guida turar inn den historiske Hylsfjorden på bestilling – fjorden som før utgjorde ei av dei viktigaste ferdselsårene mellom aust og vest i landet!
Besøk Nord Europas største kunstige vatn, Blåsjø. Vassmagasinet er ein del av Ulla-Førre og produserer om lag 8% av det totale energiforbruket til Noreg. Blåsjø består av 11 små og større dammar, der Oddatjørndammen og Førrevassdammen går an å køyre til. Dammane er eit mektig syn, og vel verd eit besøk uansett om ein er oppteken av kraft eller ei.
Kvar grend i Suldal har også eit rikt turnettverk. Forslag over turstiar finn ein under «vandring» her på VisitSuldal.no. I heia finn du også flotte turstiar, samt DNT sine turisthytter. Om vinteren blir det køyrd opp 70km med merka skiløyper i Gullingenområdet.

Organisering av turen til og i Suldal

Suldal ligg langs Nasjonal turistveg Ryfylke, to timar frå Stavanger, Haugesund og Odda. Ein kan difor enkelt koma seg til oss frå store deler av regionen. Frå Haugesund og Røldal går det buss, medan ein frå Stavanger kan ta hurtigbåten –noko som er ei oppleving i seg sjølv!

Suldalsbussen tilbyr bussar av ulike storleikar for dei som ønskjer at transporten til Suldal og/eller under opphaldet skal bli tatt hand om. I Suldalsbussen nyttar dei også lokale guidar som kjenner reisemålet vårt godt! Vatlandsvåg taxi tilbyr også transport for grupper på bestilling. Hjå ReiseTeam kan dei også vera til hjelp med å utvikle heile pakkar for deg som ønskjer at nokon skal ta seg av planlegginga av ramma for samlinga med opphald, servering og aktivitetar.