Hålandstunet

Håland har alltid vore ein av hovudgardane i Erfjord, og blir drifta av Ryfylkemuseet. Stovehuset på Håland er det best møblerte og utstyrte av dei antikvariske bygningane til Ryfylkemuseet. Her får ein eit innblikk i korleis livet var på storgarden, og korleis dei betre stilte i bygdesamfunnet hadde det.

‍

Mellom 1640 og 1740 var Håland lensmannsgard og tingstad i fleire periodar. Anlegget er restaurert, og består i dag av dei tre bygningane målastova, homannsbua og stovehuset. For å besøkja praktgarden Håland tek du av frå riksveg 13 i Hålandsosen mot Østerhus. Over brua tek du til venstre.

Ein av dei gjevaste gjenstandane i Ryfylkemuseet si eige er Hålandsbibelen eller Kong Christian den IIIs bibel frå 1550. Det er spesielt at eit eksemplar av denne første danske bibelomsetjinga kom til Håland. Bibelen vart funnen bakom panelet i den eine stova på Håland då det skulle leggjast inn elektrisk straum i 1913. Her kan den ha vore i fleire hundre år før han vart funnen att. I dag kjenner me berre til at det finst 35 eksemplar av denne bibelen i Noreg, av desse er 5 i Rogaland. Bibelen ligg i dag på magasin.

Følg med på Ryfylkemuseet.no for opningstider og arrangement.

‍